Ka va ngai che em

April ni 4 2011 hi kum 11 kan zinga i awm tawh lo na ni a lo ni renga, nimina thil thleng ang maia ka tana a la chian laiin a kum zawng chuan a lo rei ve leh ta hle mai maw. I dam laiin I tih duh tam tak, i tih tur tam tak ti hman lovin mual min liam san a, kan ngaih zia che te hi i dawn pha lo em ni aw ka ti thin. Kum 11 chhunga thil inthlak nasat tawh zia te leh a changkan tawh zia te hi hmu ve in hre ve la ka van ti thin tak em, khawl thil I lawm thin zia leh tun huna a changkan tawh zia te hi i hmuh atan ka va han it ve thin tak em. I awh ve em em thin Cell Phone tha fe fe tawh tam zia te leh thil dang dang I awh ve thin em em te hi hmu ve la ka va han ti em. Mahse dan zawh rualloh in min liam san a ngai ta si.

I boral lai khan ka nau pawh kum 2 mi chauh a la nih kha, tunah chuan kum 13 mi niin pawl 8 lai a zir ve tawh asin. I fanu neih chhun hi hmuve la chu i va han chhuang dawn tak em. Keipawh ka thawhchhuah liau liau in motor te ka lei ve tawh in ka u pawhin a thawhchhuahin bike te a lei ve tawh asin; heng zawng zawng te hi min hmula min va han chhuang dawn tak em.

Nangmahah zir tur tam tak, a bik in keimah hian ka va han nei tam teh lul em. Midang laka i dawhtheih thin zia te, mi i khawngaih thin zia te leh i unau fa te zawng zawng nena I fate bik pawh thliar hrang lova min hmangaihna te kha a va lo ropui tak em. Mi pa te angin Pathianthu sawi in inkhawm tam lo mahla nang anga Pathianthu awih si kha ka la hmu tam lo khawp asin. Ka u te inkhelh dawn ni a in khuma thu chunga I lo tawngtai te kha ka mitthla ah hian a la chiang kher mai; ka u te an chak a, ka u hming Mizo Aw Chanchinbua a rawn lana i chhuan zia te kha, I tawngtai sak thin vang anih tih kan lo hrethiam der si lo.

Kum 11 lai liam tawh mahse Ka Pa a va la na vawng vawng em vele. Pa tel lova hringnun hmachhawn hi a lo harsa ngei mai. Awh zawng it zawng nei ila mi fate chuan Pa dil tur an la nei a, keini chuan Nu chauh asin kan neih tawh. Min kalsan hi hriatthiam harsa ka va han ti thin tak. Pa Mazira, kan pa neihchhun lahin hmanni lawk ah min kal san a Siamtu thil rel dan hi chu a mak ka ti lo theilo, thiante thik rum rum chang te ka nei thin asin. Pathianin kan tana tha tur lo chuan ro a rel lo tih te hi ka tan chuan awih a harsa thin ngawt mai, I thih hi ka tana a thatna hi ka va han hre lo tih ten ka ngaihtuah thin.

Kum liam zel mahse kan ngaih che hi a bang dawn lo anih hi, a rei tulh tulh a, a na tulh tulh emaw tih mai tur hi ani. Rilruna satliah mai mai te chu hun a ral in a reh mai thin a, i thihna kher kher hi chu ka dam chhung hian ka hrethiam thei dawn lo anih hi.

Ka Pa, engpawh nise a vawi 11-na atan Mangtha phawt mai le.