Ka Nau Pass

Ka Nau leh kan farnu neih chhun pawn B.A. zo ve ta.

 Kum 2 leh thla 2 mi lek anih laia boralsan tu ka Pa piancham ah an result a chhuak hi a lawmawm dan a danglam viau mai.

Ve se.....tih hi hlawhtling vek turin duh mah ila, duhthusam erawh a thleng vek thei silo.

Van hmun nuamah Lalpa kiangah ka Pa chuan a piancham leh kan farnu neihchhun B.A. pass hi an lawm ngeiin ka ring.

KHAWNGAIHNA

Khawngaihna tih thu ringawt pawh hi a ropui a, Pathianin mihring te min khawngaih leh hmangaih vangin tun hi kan thleng ti ila kan sawi sual awm lo e. Khawngaihna hi chi hrang hrangin a thliar theih anga chung zinga khawngaihna ropui ber kan dawn chu Pa hnen ami hi ani.

Rawngbawltu tamzawk hi chuan kan thawhhlawh ringawt hi kan ngaihtuah a. Kan fel, dan pawh kan zawh ṭha thawkhat, sawisel tur pawh kan awm lo, beram huang chhungah kan awm ṭha. Mahse fapa tlanbo u ang maia lo indahsan a, huana thawk hmasa anga thawk tam bika inngai hi kan awm fur thei awm e.

Dik tak chuan tumah hian Pathianin a tir aṭanga min beiseina kan pha tawh lo. Kan Pathian hi hlawh ni lova, phu lote hnena Present pe ṭhin Pathian a ni tih hi kan hai leh ṭhin. Felna leh fair taka kan awmdan ang zela hlawh la tur ni ila kan thil tih ṭhat ber pawh hi pawnchhe hnangkhai ang a nih chuan tumah hian Vanram hi kan phu lo. Kan Pastor ho hian hremhmuna tla vek tur kan ni. Mahse Khawngaihna Formula ah chuan misual ber pawh vur angin kan lo var ta lawi si.

RINAWMNA

Rinawmna han tih hian a huap zau khawp mai a, amaherawhchu Krista tana kan rinawm hi a pawimawh lai ber chu ani ang.  Pathian thutiam, ‘He ramah hian awm la, rinawmna ûm zêl rawh, Lalpa chungah chuan lâwm bawk rawh, tichuan, i thinlung duhzâwng chu a pê ang che’ tih hi keini ringtute tân chuan thudik tûr a ni asin.
 Rinawmna ban chu ‘Dikna leh Taimâkna’ a ni a, chu chuan Hlawhtlinna Dik tak chu min pe ṭhîn a, chu hlawhtlinna chu a par a mawi a, midangte a huap zo a, mi zawng zawng hlawhtlinna a ni ṭhîn.

Kan Bible chhûng a ni emaw, Khawvêl History a ni emaw an thil tih kawng tinrenga Pathian ṭih a, mi rinawm leh mi ti tak tak te chuan an nih tûr dik tak, an tana Pathian ruahman chu an hâichhuâkin Pathian-in hmuingîlna a pe ṭhîn a ni.

Dik lo taka i tiha i neih ai chuan dikna ṭana rinawmna nên i neih loh ngamna kha sum tak tak pawhin a lei zawh loh thil hlû – *Pathian mizia chu a ni e*.

Ka Nu

Ka Nu, khawvela ka hmangaih ber leh min hmangaih bertu leh duh duh min pe thei tu nia rin, chau ve theilo ang maia ka hriat.

Kan inchhung amah vangin a him a, ka fak ngailoh vangin a vui hek lo. Thil hote ka tih pawhin lawmna a hmu zel a, Pathian a ṭihna chuan ka nun a veng ani.

Ka zawhna te ril tak taka min chhan sak ṭhin tu ani a, uang lo leh chapo lo tura min fuihtu ber ani. Vanram kan luah theih nan chhun zan zawma min ṭawngṭaisak tu ani a, entawn tlak nun ka neih theih nan ka Nu'n min fuih fo ṭhin.

Ka damchhunga ka zir chhuah theihloh tur nun neitu chu Ka Nu ngei hi ani.

Ka Nu ka hmangaih che.